Ռուսաստանը հույս ունի, որ «3+3» տարածաշրջանային հարթակի՝ Ադրբեջան, Հայաստան, Թուրքիա, Իրան եւ Ռուսաստան երկրների արտգործնախարարների մակարդակով հաջորդ հանդիպումը կկայանա կամ Երեւանում, կամ Բաքվում։ Այս մասին հայտարարել է ՌԴ արտգործնախարարության փոխնախարար Միխայիլ Գալուզինը՝ Պետերբուրգի միջազգային տնտեսական համաժողովում։
«Մենք հույս ունենք, որ նախարարների հաջորդ հանդիպումը տեղի կունենա կամ Բաքվում, կամ Երևանում։ Ինչպես հասկանում ենք, այդ ուղղությամբ բանակցությունները շարունակվում են մեր ադրբեջանցի և հայ գործընկերների միջև», – ասել է նա՝ նշելով, որ քննարկումները շարունակվում են։
Գալուզինը նաև նշել է, որ Ռուսաստանը շարունակում է հարգանքով վերաբերվել Վրաստանին՝ որպես կարևոր գործընկեր։ Նրա խոսքով՝ «3+3» հարթակի հեռանկարները լիարժեք կլինեն, եթե հարթակին միանա նաև Թբիլիսին։ «Կցանկանայի հատկապես ողջունել Վրաստանի փորձագիտական շրջանակների ներկայացուցչի մասնակցությունը մեր քննարկմանը։ Մեզ համար, ինչպես և, վստահ եմ, հարթակի բոլոր մասնակիցների համար Վրաստանը մնում է կարևոր գործընկեր։ Հուսով եմ, որ ժամանակի ընթացքում պաշտոնական Թբիլիսին նույնպես կմիանա մեր աշխատանքին», – ավելացրել է նա։
Հիշեցնենք, որ «3+3» ձեւաչափով առաջին հանդիպումը տեղի էր ունեցել 2021 թվականի դեկտեմբերին Մոսկվայում։ Դրանից հետո հանդիպումներ են կայացել Իրանում (2023 թվական) և Թուրքիայում (2024 թվական)։ Վրաստանը, որը նույնպես հրավիրված էր, մինչ օրս չի մասնակցել այդ հարթակի աշխատանքներին։
