Ինչպես նախկինում, այնպես էլ այսօր Ռուսաստանում ընդունված է տեսակետը, որ Երևանը Մոսկվայի բնական դաշնակիցն է Հարավային Կովկասում։ Այս մասին հայտարարել է Ռուսաստանի արտաքին գործերի նախարարի տեղեկատու Միխայիլ Գալուզինը՝ անդրադառնալով Երևանի արևմտյան երկրների հետ մերձեցման ռազմավարությանը։
«Մեր հարաբերությունների ռազմավարական կարգավիճակն ամրագրված է պատկառելի իրավապայմանագրային բազայում։ Մենք միշտ հանդես ենք եկել ուժեղ և իսկապես ինքնիշխան հայկական պետության օգտին։ Համոզված ենք, որ Ռուսաստանի և Հայաստանի դաշնակցային փոխգործակցությունն այլընտրանք չունի։ Մեր երկրների և ժողովուրդների միջև ամուր կապերը մեծապես ձևավորում են հանրապետության և ողջ տարածաշրջանի կայուն զարգացման հիմքը։ Երկկողմ համագործակցությունը, համակարգված աշխատանքը ընդհանուր եվրասիական կառույցների շրջանակներում Հայաստանի ապագա բարգավաճման գրավականն են», – նշել է Գալուզինը։
Ռուսաստանի պաշտոնական անձը նաև հավելել է, որ հայկական կողմը բազմիցս հաստատել է ԵԱՏՄ շրջանակներում Ռուսաստանի հետ կապերի և համագործակցության ներկայիս մակարդակը պահպանելու մտադրությունը։ Այս հարցով նրա մոտեցումը համահունչ է Հայաստանի Ազգային ժողովի նախագահ Ալեն Սիմոնյանի հայտարարություններին, որը փետրվարի 5-6-ը կատարած Մոսկվա այցի ընթացքում հանգամանորեն խոսել էր այդ հարցի մասին։
Գալուզինը նկատել է, որ, թեև Հայաստանի վարչապետ Նիկոլ Փաշինյանը հայտարարել է, թե Երևանը չի ցանկանում վնաս հասցնել Ռուսաստանի շահերին, սակայն տեսնվում է, որ Հայաստանը արագացնում է արևմտյան երկրների և միավորումների հետ ռազմաքաղաքական և տնտեսական մերձեցման տեմպերը։
ՌԴ փոխարտգործնախարարը նաև վստահություն է հայտնել, որ Երևանում լիովին գիտեն ռուսական կողմի սկզբունքային գնահատականները ԵՄ-ին և Եվրասիական տնտեսական միությանն անդամակցության անհամատեղելիության վերաբերյալ։ Նրա խոսքով՝ Երևանը պետք է հասկանա, որ միաժամանակ անդամակցելով երկու տարբեր ինտեգրացիոն միավորումների, չի կարող ապահովել ԵԱՏՄ-ի կանոնների և նորմերի պահպանումը, ինչը կարող է հանգեցնել բացասական հետևանքների։
«Ակնկալում ենք, որ հանրապետությունում կելնեն պրագմատիկայից։ Հայաստանի տնտեսության աճի բարձր տեմպերը, գնաճի ցածր մակարդակը, ամուր ազգային արժույթը, հայկական արտադրանքի սպառման ընդարձակ շուկան. այս ամենի գրավականը Ռուսաստանի հետ կոոպերացիան է նաև ԵԱՏՄ շրջանակներում», – եզրափակել է Գալուզինը։
Ավելի վաղ Ռուսաստանի փոխվարչապետ Ալեքսեյ Օվերչուկը հայտարարել էր, որ Եվրամիությանն անդամակցելու գործընթացի մեկնարկի մասին Երևանի որոշումը դիտարկում են որպես Եվրասիական տնտեսական միությունից Հայաստանի դուրս գալու սկիզբ։
